قصيدتان من شعر العامية للشاعر على الحكيم

الشاعر الدكتور على الحكيم حسن* من شعراء العامية المتميزين وصدر لة ديوان بالفصحى عام 2001 ونقدمة اليوم من خلال المنبر الحر صحيفة ” الساعة 25 ” فى قصيدتان بالعامية .

عتاب

ماتقطعيش كل الحبال
و ادي العتاب فرصة و مجال..
كل اللي حبو بيندموا
لما الحكاية بتنتهي
من كلمتين طلعوم تقال…
اصل اللسان وقت الغضب..
بيكون مدب..
و نقول كلام نندم عليه
و قت العتب..
بس اللي بينا ياعمري
شيء محطوت في
جنب…
عمر السنين ماهتلمسه
بالعكس دحنا
هنحرسه..
اهو ده اسمه حب..
لكن نطول فالخصام…
و يبات زعلنا فحضننا
و نروح ننام..
ده يا روحي طبعا
مش تمام…
هي الحياة دي
اد ايه علشان
تضيع كدة فالهوا..
ده العمر حلو ياعمري
لو عشناه سوا…

امي قالت
شايفة ابوك
مش زي عادته…
لما قام من نوم
نداني و جيت
سندته…
حتى شكله
و هو نايم مش
عاجبني…
روح وبص للون
شفايفه..
جوة قلبي
شىء قالقني..
قلت يا اما
ماتقلقيش..
كل مشكلته الانيميا…
بكرة ياخد دم تاني
و وضعه يتحسن فثانية…
كنت عارف يابا انك
هتفارقنا..
كنت بدعي الله
يغثني بحيل
و قوة..
كنت عارف يابا
انك مش هترجع
لينا تاني..
بس كاتم كله جوة..
كنت خايف
اني انطق..
القى يا با دموعي
نزلت..
و البنات يشفوني
ببكي..
..تبقى خلصت..
و امي حست..
شوفت جوة عنيها
عمرك..
و اللي كانت طول
حياتها زي طفلة..
فجأة كبرت..
كنت بكذب
و الحقيقة
شيء رهيب..
طب تصدق يابا
بندم اني كنت
فيوم طبيب..

*د.علي الحكيم

علي الحكيم حسن علي.شاعر مصرى معاصر. ولد فى 19 -9-1980 طبيب بشرى ….شاعر فصحى و عامية ، روائي …قدمة الشاعر.فاروق جويدة في ديوانة الأول الذى بعنوان( اليها)و هو بالفصحى سنة ٢٠٠١م… لة ديوان جديد تحت الطبع بالعامية المصرية .

اقرأ/ى أيضا :

المحتويات