شعر : محمد عبد القوى حسن
فى عيد ميلاد احمد فؤاد
النجم ساطع فى البلاد
عمر الحقيقة ماتتنسى
وايد شريفة ماتترشى
طب هات لنا قهوة وداد
ورش ع القعدة انبساط
النجم فاجومى
والديك ماهوش رومى
والمانجة طالعة ع الشجر
والورد بيهادى القمر
دول جوز تيران ياحبيبتى
جوز تنابلة مش تيران
جوم خدونى وعلقونى
من هدومى على اللومان
الورد احمر لما بان
كروان بيسطع ف الميدان
صعلوك ف عصرة وديدبان
اهلا وسهلا بالمعارك
ياللى كان بدك تشارك
هات لنا الطولة يانوح
وتعالى نقعد ع السطوح
طلع القمر من المقطم
نام القمر من فوق بولاق
علق فانوسة ف الوراق
الشمس بتهادى العشاق
والوردة دى لعزة
والحب ده معزة
والمستكة تطلع ريحان
الذوق امان
قافل حيطان
يادى الجدع
ياللى انت عامل صولجان
دخل البتاع طلع البتاع
وزع على سوق التلات
اربع عيدان
نعناع منعنع ياولد
ضهرى النحيف ياما انجلد
والهوش ناموس ركب الفرس
والكلبشات ف ايد الحرس
الرحلة طالت
واليد مانالت
والبرد تكتك م الهموم
الرحمة على ابو النجوم
اربع ملايكة ف الحارات
بيوزعوا ف يوم ميلادك الشربات
وانا جاى من اخر قاموس
عاشق لكوب العرق سوس
رحمة ونور تطرح وداد
على عمنا احمد فؤاد
ابو النجوم
