المسحراتي الحلقة 11 رمضان بالخير اهو جانا
شعر : محمد عبد القوى حسن
—————————————
رمضان بالخير اهو جانا
يعمر بيت المصـــرين
رمضان جانا لهدانا
ياخدنا لدرب الخير ياامين
رمضان الشهر الطيب ..
دايما من قلبى قريب
رمضان رمضان ياحبيبنا
تعالى وخدنا لعليين
رمضان بالخير اهو جانا
يعمر بيت المصـــرين
*** المسحراتي الحلقة 11
تسابيح من طلعة فجره
قران ياحلاته ف عصره
اذكار واوتار واقمار
مليانه الدنيا عمار
طب مين هايعمر قلبنا غيره
بطول العام مستنيين
رمضان بالخير اهو جانا
يعمر بيت المصـــرين
***
واقفين على بابه بفرحه
وقلوب الخير منشرحه
للذكر الخير والطاعه
ولعمل الخير بوداعه
كلنا بنطل عليه واليه
والله شاددنا حنين
رمضان بالخير اهو جانا
يعمر بيت المصـــرين
***
على باب رمضان بنسبح
صايمين لله وبنركع
ساجدين راكعين قايمين
وف ليله بنسهر اكتر
نذكر ف الله ونكبر
نخلص من كل ذنوبنا
ونطلع منه كده هايمين
رمضان بالخير اهو جانا
يعمر بيت المصـــرين
*** المسحراتي الحلقة 11
وبطول اليوم بنجهز
نعمل شربات وعصاير
والديك يتحمر يجهز
عناب وعنب وفطاير
والسلطه الخضره الحلوه
ومعاه كلام الغنوه
وحوى ياوحوى يامحلاها
حلوه جميله ف معناها
وجلاش وكنافة قطايف
ومعاهم قمر الدين
رمضان بالخير اهو جانا
يعمر بيت المصـــرين
***
من بعد مايدن رفعت
تلقى القعدات اتنصبت
اصناف م الاكل اترصت
وصوانى كتير اترفعت
والكل راضى ع الكل
حاسس بالكل بكل حنين
رمضان بالخير اهو جانا
يعمر بيت المصـــرين
*** المسحراتي الحلقة 11
والكل يقوم ويصلى ..
ياروايح هلى وهلى ..
وتعالى خدينا وطلى ..
على روحنا وهنى ارواحنا .
. وادخلى بينا لعليين ..
رمضان بالخير اهو جانا
يعمر بيت المصـــرين
قد يعجبك أيضا:
عذراً التعليقات مغلقة